Salut mes gins,

I faut que je le dise à quelqu'un vu que je chus un tiot peu avec m'guiffe qu'elle pind...

Ch't'au matin après que j'ai quitté m'paillasse, fait pichi l'petit, donné à minger et sorti l'cat, mis l'machine à café à cauffer, j'ai été vir min lordi pour mettre l'musique in route et vir si qu'i a du neu ichi ou là.

Et dins les 2 émiles qui avotent échappé au transfert automatique vers l'bac à l'ordure, i n'd'avot un d'un certain robin, écrit in ingliche. J'ai pris cha pour de l'réclame ou du mamadou et j'allos l'mettre au bac à l'ordure aussi. Et pis je me chus dit: "quo qu'ch'est qu'i veut monhomme? Ch'est incore un qui me dit qu'i faut li rappeler mes coordonnées de binque?". I faut dire que des fos ch'est comique. Bref, j'ai été vir et... tcheue surprisse! Ch'étot écrit in ingliche - mais cha va, je me débroule - et cha dijot in gros: "bonjour min garchon, je t'informe qu'in utilisint cheule adresse émile j'ai trouvé l'accès à eune application pour laquelle tin mot de passe secret ch'est: et là i avot in clair min mot de passe secret pour certains forums et autres.

Au final cha a l'air d'un gintil ch'garchon, vu qu'i explique que ch'est foque pour m'n'information et qu'i ne me recontactera pus. I ne veut nin de doupes. I suggère foque de chinger mes mots de passe dins mes applications sinsipes. Je l'ai fait tout de sute, y compris pour ch'forum ichi, qu'i ne dot nin être dins l'liste de priorité des zaqueurs quiind même...

Cha vous est déjà arrivé eune séquo ainsi?

Si que cha vous intéresse, je peux vous donner les coordonnées du bonhomme, mais cha ne servirot nin à grind cosse parce que à m'mote que si qu'i avot pouvu faire l'rapprochemint intre eune adress émile et un mot de passe i vous l'arot dit.

In tous les cas, chinger de mot de passe de timps in timps, même si que ch'est arcommindé, je ne l'faijos jamais pour cause de mémoire qui ne suit nin. A ch't'heure j'ai chingé d'avis!

I faut dire que min garchon i m'a indiqué eune application qu'elle s'appelle KeePass (je ne sais nin si qu'in a l'drot d'in causer ichi dessur) et que ch'est eune tiote mervelle à part qu'elle est in ingliche. In tous les cas cha note et crypte les mots de passe, par application. Du cop, pour s'inscrire à un site à mot de passe, i n'a qu'à faire un copier coller et berdaf, ch'est bon. Même qu'au bout de quelques secondes cha qu'i a été copié i est oblié.
Et in peut copier tout cha chu eune clé usb ou eune séquo ainsi, des fos que l'ordi i a eune attaque d'apoplexie...

Allez, bonne journée mes gins, je m'in artourne à mes occupations. Je vas mettre mes mains dins le cambouis (je chus in train de chinger l'moteur de m'mobylette).