Avant les fêtes que je vous souhaite heureuses, un petit dernier avant que je quitte le réseau pour une grosse Quinzaine. Merci à Cauchette de son assiduïté.
Panther Papy
A L'NOUVELLE INNEE
Bonne Innée, bonne santé mes gins;
Ch'est aujord'hui l'nouvelle Innée;
In est tertous su s'trente et un,
Et chacun d'nous va s'souhaiter
Plein d'bonnes affaires, surtout l'santé;
Des gosses à ch'ti qui veut n'davoir,
Des sous pou ch'ti qui n'da minqué,
In a dins coeur beaucop d'espoir.
Et j'arbusie , y a d'cha longtimps,
J'étot ocore tout tiot, tout tiot,
Qu'in s'in allot pa tous les timps,
Pour faire nos fricasses à musiaux.
A no cou, in avot s'malette.
Qui pindot parfos s'qu'à nos pinches,
A forche d'archévoir des pièchettes
Qu'in nous donnot pou no diminche.
Des fos, fallot beaucop d'courache,
In étot pas toudis haureux
D'imbrasser les tantes à moustache,
Et cheux qui nous paraichotent vieux.
I n'avot des maisones à faire
A dix kilométes à la ronte,
Pou nos tiotes gampes, ch'tot un calvaire,
Mais fallot cotinter tout le monte.
A ch't'heure, les gins i ont bien cangé;
I s'donnent-te des cops d'téléphone,
I s'invotent des cartes pleins d'doré...
Et in vot presque pus personne.
Mais mi e j'garde chés traditions;
Aveuc mes parints, mes infints,
In s'artrouéffe insanne dins m'mason,
Pou c'mmincher l'année joyeus'mint,
Autour de l'tape in s'met tertous
A partir d'bonne heure au matin,
Et là vas-y comme é j'té pousse,
In bot, in minchen in est cotint.
In vot des monts d'gauffes e d'su l'tape,
Plein d'bonnes affaires pou nous minger,
Comme ch'est fiète, in a mis cheule nappe,
Allez les infints! faut besqu'ter.
In bot du café pis de l'goutte,
Du blinc, du rouche rt même de l'bière,
Les estomac sont in déroute,
Tint pis, l'foie i ara des misères.
Dins l'z'autes masones in arcimminche,
In s'imbrasse et aveuc plaisi,
D'bon coeur in rit tout plein s'pinche,
In racontint chacun sin dit:
Untel i a cassé s'gampe e d'bos,
Machin i est mort et interré,
Cousine al a eu des jumeaux,
Tout l'monte in même timps veut d'viser.
In est détindus, bin cotints,
Et i n'vot point passer les heures,
Mais déjà, l'jour du nouvel in
I s'finit ...... et j'ai d'mau à m'coeur.
Paul Sébille
Sujet: A L'NOUVELLE INNEE pat Paul Sebille 
Mer 14 Déc 2016 - 7:45
