Refrain:
Dors, min p’tit quinquin,
Min p’tit pouchin
Min gros rojin
Te m’fras du chagrin,
Si te n'dors point ch'qu’à demain
Premier Couplet
Ainsi, l’aut’jour, eune’ pauf’ dintellière,
In amiclotant sin p’tit garchon,
Qui d’puis tros quarts d’heure, n’faijot que d'braire,
Tachot d’ l’indormir par eune’ canchon,
Ell’ li dijot : Min Narcisse,
D’main t’aras du pain n’épiche,
Du chuc à gogo,
Si t’es sache, et qu’te fais dodo,
Dors, ...(refrain)
Deuxième Couplet
Et si te m’laich’ faire eune’ bonn’ semaine,
J’irai dégager tin biau sarrau,
Tin patalon de drap, tin giliet d’laine,
Comme un p'tit milord te s’ras farrau,
J’ t'acatrai, l’jour de l’ducasse,
Un polichinell’ cocasse,
Un turlututu,
Pour juer l’air du Capiau pointu.
Dors,...(refrain)
Troisième Couplet
Nous irons dins l’cour Jeannette-à-Vaques,
Vir’ les marionnettes, comme te riras,
Quand t’intindras dire : Eune doup’ pou’ Jacques,
Pa’ l’ polichinell’ qui parle magas.
Te li mettras dins s'menotte,
Au lieu d’ doupe, un rond d’ carotte,
I’ t’ dira : Merci.
Pins’ comm’ nous arons du plaiji.
Dors,...(refrain)
Quatrième Couplet
Et si par hasard sin maite y s’fache,
Ch’est alors Narciss’ que nous rirons,
Sans n’ avoir invi’ j’prindrai m’n air mache,
J’ li dirai sin nom et ses surnoms,
J’li dirai des faribolles,
I m’in répondra des drôles,
Infin, un chacun,
Verra deux pestac’ au lieu d’un.
Dors,...(refrain)
Cinquième Couplet
Allons serr’ tes yx, dors min bonhomme,
J’vas dire eune prière à P’tit-Jésus,
Pour qui vienne ichi, pindant tin somme,
T’ fair’ rêver qu’ j’ai les mains pleines d’écus.
Pour qui t’apporte eun’ cotchille,
Avec du chirop qui guille,
Tout l’ long d’ tin minton,
Te pourléquras tros heur’s ed long.
Dors,...(refrain)
Sixième Couplet
L' mos qui vient, d’ Saint-Nicolas, ch’est fiête,
Pour sûr, au soir, i viendra t’trouver,
Y t’fra un sermon, et t’ laich’ra mette,
In d’zous du ballot, un grand panier.
I l’ rimplira, si t’es sache,
D’ séquos qui t’ rindront bénache,
Sans cha sin baudet,
T’invoira un grind martinet.
Dors,...(refrain)
Septième Couplet
Ni les marionnett’s, ni l’ pain n’ épiche,
N’ont produit d’effet, Mais l’ martinet
A vit’ rappajé l’ petit Narcisse,
Qui craignot d’ vir arriver l’baudet.
Il a dit s’canchon-dormoire,
S’ mèr’ l’a mis dins s’n' hochenoire,
A r’pris sin coussin,
Et répété vingt fos che r’frain :
Dors,...(refrain)