Vous allez dire que je me réveille un tiot peu in retard à ouvère à ch't'heure un sujet chu l'fiête de l'musique, mais i s'passe que je pinse régulièrement à cha à quo que j'ai assisté cha va faire 2 semaines.
Et je voudros savoir si que parmi vousautes i a aussi des gins qui ont des fos des séquos bizarres qui se pastent dins lu tiête ou lu tchoeur.
Bref, i a 2 semaines, in est allés passer un momint à l'fiête de l'musique d'eune toute tiote ville - peut-être d'ailleurs que ch'est un villache - dins le secteur d'ùche que j'habitos avint, in Alsace. Cha sintot l'merguez vu que l'fiête de l'musique cha a l'air de devenir aussi l'fiête du minger n'importe quo! Et forcémint, i avot de l'musique, même des scènes avec un préau, comme les vedettes. Au tchoeur de l'fiête, ch'étot surtout des djones qui juottent du tatapoum à tout berzingue. I n'd'a aussi qui imitottent des canteux in faijint du play back. Bon, i avot assurémint grammint d'heures de répétition et j'ai arwetchi un tiot peu quind même vu que l'musique je préfère tchand que ch'est jué in vrai.
Et in allint assez loin du tchoeur de l'fiête i avot un couple de canteux qui s'accompagnottent à l'guitarre. Is cantotent des canchons plutôt country. Des fos in inglais, comme cha in n'écoutot que l'musique.... et ch'étot fin bin.
Et cha qui m'arvient régulièremint à l'esprit depuis, cha s'est passé nin loin de ch'couple qui cantot. In rintrot duchemint vers le point de départ tchand qu'in a vu un viux pépère chu eune vielle cayelle in bos, aux commintes d'un synthétiseux qui avot déjà bin vécu et qui avot de toute évidince grammint trop de boutons pour sin proprio. In puq, là d'ùche qu'i étot i n'avot nin grammint de leumière. Plus tard s'femme elle li a amené eune limpe de bureau. Bref, après avoir réussi à appuir chu tous les boutons qu'i fallot, et avoir les rythmes et accompagnemints qu'i voulot, pépère i s'est mis à canter. I s'a linchi dins "Mexico", cha qui est un tiot peu gonflé à s'n'âche. I s'est avéré que ch'est le proprio du magasin de bottines devint lequel i étot installé, et qu'i a 82 ins! Les gins is s'ont arrêtés et l'ont arwetchi avec des sourires fin bénaches. Tchand qu'i a eu fini i a été applaudi un max, cha qui l'a de toute évidince grammint étonné.
I s'a arbattu avec les boutons de sin manicraque et i a continué avec des tubes du ginre "Vous permettez monsieur...", cha qui à s'n'âche étot un tiot peu comique quind même. D'autint que vu sin succès et probablemint s'mémoire, i a passé certains coplets plusieurs fos...
Voilà. Ch'est nin grind cosse je vous l'accorte, mais ch'est un momint qui a de l'misère à arsortir de m'mémoire.
Ch'est que je ramollis du ciboulot ou i n'd'a des autres qui sont aussi sinsipes à des situations toutes biêtes ainsi, d'ùche qu'in se dit qu'i ne faut nin grind cosse pour être heureux?