I a nin longtimps, in allint faire min plein d'essince au supermarché (Cora à Mulhouse) j'ai été surpris par le monte qu'i avot à faire l'tcheue.
J'ai d'abord pinsé qu'is faijottent eune opération prix coutint, cha qui permet de gagni eune tiote paire de chintimes par litre mais qui attire un monte nin possipe, qui joque eune demi heure pour gagni 1 euro. Ch'coup-là les gins is joquottent côté "avec caissière". Côté paiemint par carte i avot moins de monte et ch'est là que je chus allé.
Et pis i est apparu que ch'coup-là, pindint deux jours, t'acatos au moins 30 litres d'essince et à l'caisse, après que t'avos payé, in te donnot in bon d'achat de 17 (dix sept....) roros à dépinser l'semaine d'après, pour acater n'importe quo foque de l'essince et eune ou deux autres séquos. Du côté des cartes i avot eune guernoule à l'sortie, assise à eune tafe. Te li montros tin reçu de carte et berdaf, t'avos tin bon d'achat.
Et forchémint, l'semaine d'après, si t'oublios nin, t'allos dépinser tin bon d'achat au boutique.
Conclusion: non seulemint is font l'essince moins chèrte, mais à ch't'heure, in puq is te forçtent à aller acater au boutique, in te donnint l'somme minimum à y dépinser. I faut in effet être un tiot peu mesquin pour ne dépinser que ches sous-là...
Is ont du se rinte compte qu'i a grammint de monte qui ne va au supermarché foque pour acater de l'essince et avec des opérations ainsi, is rappèltent à ches gins-là que l'partie principale du magasin elle est ailleurs. Tout cha in donnint à l'opération le nom de "l'essince à 1 euro, ch'est possipe".
In tous les cas, capieau bas à ch'ti qui a ***çu cha. Quo qu'ch'est qu'is vont incore invinter?