Pour certain'es gins l'diminche matin
Ch'est l'occasion de s'arposer,
Ch'est bien normal et chà s'comprind
Surtout quand in est ouvrier.

Mais y'en a d'autres et j'sus d'ceux là
Préfèrent quitter l'lit l'premier,
E'j veux à tout prix être in bas
Quand les autre's dorm'ent à poings fermés.

Et j'tourne et j'ratourne dins min lit,
Y'a pu moyen de fermer l'eul,
Quequ'fos i'est pas cinq heures et d'mie
Quand j'm'artrouve dins l'cuisine tout seul.

Après un p'tit coup d'eul à l'glace
Pour vir si ch'est bien mi qui est là,
J'ouvre alors el boutelle éd'gaz,
Un'e aut' journée comminche déjà.

Mais si vous êtes comme mi
Vous avouerez,ch'est bien normal,
Qu'après avoir dormi un' nuit,
Un'goutte éd jus,ch'est un régal.

Alors duch'mint, sans faire ed'bruit,
Ej' fais bouillir un' castrol' d'iau,
In n'voudrot pas écourter l'nuit,
De ceux qui dorment, surtout les t'chots.

E'j ravisse un p'tit coup à l'fenêtre
Pindant que min café passe,
Un chuque à ch'tien qui m'fait la fête,
Sur un plateau, j'prépare les tasses.

Et quand é'j'pinse les surprinte,
In leur offrant l'café au lit,
J'les trouve réveillés,prêts à l'printe,
L'bonne odeur du jus m'a trahi.

Charles BRUCHET

In lisaint c'poème, j'arvos min père tout bénèche d'sin ouvrache v'nir m'apporter un' tasse ed jus avec el sourire.....et pour pour l'armercier mi aussi j'accueuillos avec el sourire, i étot heureux, tout l'monte contint alors que......je n'sais nin rester dins min lit quind que j'suis réveillée, j'préfère préparer l'café........

Ch'est tout à fait cha Roger, j'arvos min Père quand i travaillot pon apporter ch'café au lit à m'mère in disant : cafééééé; al croquot in morciau d'chuc après avoir trimpé l'moitié dins ch'café, al buvot eun' goutte ou deux et al finichot es'chuque avec l'reste de ch'café.

y in a qui ont de l'chance , mi j'as jamais eu d'café au lit , min père y est mort , j'avos 8 mos , cha aurait été un peu jone pour boire du café
et m'mère all étot pas douche faut dire qu'alle avot pas l'vie facile non pus
elle in guise d'rével , alle criot debout , et si cha n'alot pas assez vite à sin goût , t'archevot un verre d'iau froite dins t'gamelle ,
cha , cha révelle !!......... pas vraimint avec l"sourire !

avec em' n'homme ch'étot même pas la peine d'in espérer , ch'est ptête pour cha que j'sus pas restée