I faut que j'vos raconte cha qu'in a fait c'ouiquende, infin samedi pus exactemint..
Vos savez sins doute tertous que ch'étot l'arrivée du beaujolais nouvieau, jeudi derni, si vos l'savottent pas ch'est que vos lisez nin les journeaux ni acoutez l'radio...
Ichi dins l'région, d'ù qu'in est au coeur d'l'affaire, i a plein d'manifestations diverses et variées et l'samedi i a un marathon d'organisé, eune course officielle, répertoriée dins tous les marathons d'France et d'Navarre, cha rigole pas.... bin min homme et mi in l'a fait... infin j'vas pas vos raconter d'cacoules, in a fait l'12 kms... ouais pace qu'i a tros courses, l'marathon d'42 kms, l'semi marathon d'21 kms et eune course d'12 kms qui est bin sur l'pus festife, les coureurs n'sont nin là pou faire absolumint un "temps".. I avot 3400 coureurs d'inregistrés pour chés 12 kms.
Cheule année min homme et ses copains avottent décidé d'faire cheule courses là, is s'sont intrainés, is l'ont fait in 1 h 23 mn, is sont arrivés 1937ème.
Pis mi avec des collègues in s'a dit pouquo pas nosautes, ouais mais nosautes, l'course ch'est pas vraimint nous tasses d'thé (café pou mi, SVP
) alors in l'a fait in marchant vite... bin in a mis 2 h 12, cha qui est pas mal. Mais les temps n'étottent validésque jusqu'à 2 h maximum, bon is ont quind même mis les classemints jusqu'à 2 h 06, à 6 mn près in étot classées...
Cha qui est drôle ch'est qu'in a quind même nous photos dins l'journal ! pace que ch'étot l'première fos que certaines "nounous" et personnel de l'crèche d'min villache faisottent l'course, alors l'mairie nous a incouragé in nous faisant des maillots et in nos invoyant eune journaliste nous interviouvé, cha qui nos a bin fait rire !
Pis in est fierte pace qu'in est pas arrivées les dernières, ouais pace que nosautes in n'sa nin arrêtées, in a toudis marché, alors que certains coureurs s'arrêtottent à tous les stands au bord de l'route pou boire un tiot cop... d'beaujolais
(ou d'ieau)L'an prochain in va essayer d'faire miux, pet ête courir 500 m sur les 12 kms