j'm'in va après midi animer eune visite d'villache, v'là chi un des textes que j'vas dire.il est biau, j'voulos vous in faire profiter.



ej déchinds d'eine illust' famile
grand'père avot in cavalier
et dins chés cours' sans s'faire d'bile
il arrivot toudis premier

pour li in juot de l'musique
et pis pindint que l'sous préfet
qui dijot qu'chétot magnifique
grand 'père i croquot dins ch'bouquet

mi, j'acoute la radio..l'télé..
ché mi que j'sus ch'dernier bidet

min père y étot ché des gins riches
i saquot dins sin char à banc
s'maîtresse pis sin capiau plein d'ch'riches
ch'cocher aveuc sin gilet blanc

chés z'harnais is étotent plein d'cuife
cha brillot de s'queue s'qu'à sin co
l'solel il avot l'air de l'suife
pou vire berloquer sin guerlot

mi, l'bédoulle all' much' mes jarrets
ché mi que j'sus ch'dernier bidet

car ej sus pas dins la noblesse
min patron vind des piaux d'lapins
et quand qu'i pinte aveuc Nénésse
ch'est mi que j'l'armets dins l'drot qu'min

j'ai fais quequ'fos des longs voïaches
même qu'un cop, hureux comme un roi
j'sus été conduire in mariache
jusqu'à ché tours d'mont st éloi

j'pourros pus l'faire, j'ai trop saqué
ché mi que j'sus ch'dernier bidet

min qu'min ej l'habile d'étincelles
parch'que j'rabote tous ché cayeux
dins l'temps quanq' j'étos in archelle
ch'fu d'artifich' étot plus bieu

j'trottos, j'galopos su ché routes
à mes fers luijants argintés,
min mait' sans qu'arien qu'cha li coute
aurot ralleumé sin roguet

in m'appelle ch'viux couronné
ché mi que j'sus ch'dernier bidet

li, ch'est l'pus "nob' conquête ed l'homme"
qu'in dijot d'mi.in m'avot quer
et mi j'allos...j'travaillos comme
in' machine l'été pis l'hiver.

quanqu' pour péquer des épinoques
ché infants qui voulot'nt des crins
tirot'nt su m'queue comme sur eine cloque
pou pon bouger, j'serros mes dints

et j'souhaitos qui print'nt in brochet
ché mi que j'sus ch'dernier bidet

des forch's a ch't'eur' j'n'ai pus in' buque
j'vas laicher l'plache à vous autes
j'irai pus quer in morciau d' chuque
duch'mint, duch'mint au bour d'vos dogts

gardez vous z'huil's pis vous essince
vous voétur's, leus yux d'verr' tout ronds
min crottin sintot pus bon, j'pinse
quoé qui vont d'v'nir mes tiots mouchons?

oué pus tard vous aurez d'l'argret
ché mi que j'sus ch'dernier bidet

adiu mes gins, ej vous pardonne
vous claq'mints d'fouet, vous cops d'batons
adieu, ej n'in veux à personne
d'ché jurons et d'chés cops d'éperon.

comm' récompins' dins m'tiot' cervelle
j'pinsos qu'j'auros mouru in soir
près d'min maît'..mais m'dernièr' capelle
j'ell connos: cha s'ra l'abattoir

in tann'ra m'pieu..j's'rai impaillé
in viendra m'vire dins un musée

parche equ' ch'est mi ch'dernier bidet


A LAFLUTE

lire ou chanter Camanette ?

Les paroles m'font pinser à cha ? ? ? ?


https://www.youtube.com/v/wsfgBND92vc&fs=1&source=uds&autoplay=1

ché ni lu ni canté...mais récité

l'chef y met un point d'honneur à ch'que ses comédiens sachent' leus

textes par coeur... (bon in a toudis un papier dins nous poques in cas d'malheur)

pis te vos, mi j'treuve que cha n'a rien à vire aveuc l'canchon d'bourvil (que j'ai quèr aussi armarque bien)

Ouais c'est un bieau texte camanette, qui n'dot pas ête facile à apprinde du fait de s'longueur...

Ch'est vrai qu'ch'est un bieau texte. Cha m'a fait pinser à un flime que les afants is regardotent quind qu'is étotent tiots "Le Prince Noir" ch'est l'histoire de l'vie d'un qu'va avec ches différents maites.
T'as un' sacrée mémoire.

bin, d'faire du théâtre cha m'permet d'faire fonctionner justemint m'mèmoire...mais te sais matante y m'a fallu un bon mos plein pou l'artenir...après; intre achteur pis l'prochaine fos qu'y m'faudra l'ardire, y ara des sequos qu'all' s'ront involées...faudra "réviser"

Yé pourros l'canter sur l'air "D'in arvénant d'l'arvue"...cha dévrot daller ? ?

Je chus émerveillé par l'mémoire qu'i faut avoir pour artenir cha!

Tchand qu'in raconte eune histoire, in peut broder, mais là, du mot à mot, à m'mote que ch'est au-dessur de mes forches!

Bon, cha dit, à m'mote qu'i minque un mot.... au quatrième couplet, i ne minquerot nin "jusqu'à" intre tcheue et co?

Infin, je dis cha, je ne dis rin, hein, te me connos!

T'n'histoire elle me fait pinser à cheule-là: https://www.dailymotion.com/video/x3zqma_le-petit-ane-gris_music qu'elle n'est nin chu l'air de je chus de la revue....