A l'école du villache
Quand el' nouvelle maîtresse est rintrée dins l'école
Alle pouvot pas s'douter dé c'qu'i allot i arriver;
Apprinte ches jônes à lire cha n'est point toudis drôle,
Même quand in crot qu'in sait d'jà bien faire sin métier.
Alle avot bien busié à cha qu'aIle allot dire,
Aux questions qu'aIle allot poser à ches éfants ;
Toute il étot fin prêt, i pouvottent vénir,
Alle allot leur apprinte el son CH in rien d'temps.
Alle queminche à poser des d'vinettes à ches gosses;
I s'érottent dû trouver des mots avec CH n'dins.
I n'in trouvottent pas un ! A s'dit cha ch'est quedkosse !
I sont bêtes comme leus pieds ... ou mi j'n'y comprinds rien!
Dis moi mon p'tit bonhomme, comment s'nomme l'animal
Qui traîne la charrue quand on n'a pas d'tracteur ?
El réponse aIle jaillit, ch'arot dû ête cheval...
Ech'tiot dit un bidet, des k'vaux si n'a plusieurs.
Et celle qui fait bê ... voulant faire dire la chèvre?
Moi, moi, je l'sais madame, c'est une petite maguette.
Alle a interrogé jusqu'à ch 'meilleur élèfe,
I n'ont pas pu sortir un CH ... des vrais bébêtes!
I z'ont faut qu'répondu les mots qui connaichottent :
Un kap'let, un kapiau, des katoulles, un katiau,
El kéminée qui funque, l'kémin du qu'i passottent,
El vaque ... qui tape à mouques, el kémisse pou s'faire biau !
El jus n's'arringeot point, l'maîtresse a n'érot brai,
S'leçon étot foutue, vu qu'i n'trouvottent pas
Un seul mot avec CH (j'intinds des mots français)
Alors aIle a pinsé d'minder des mots d'patois.
El classe s'est animée, ch'étot miraculeux.
Des mots avec CH n'dins ... i n'avot plein ch'tableau !
Bin nan nan qu'ches tiots-là ch'tot pas des bricoleux !
Des mots avec CH n'dins, i n'in ballent un béniau !
I a l'michorelle, madame, chelle qui fait des pinchons,
Et pis ça qu'i est pas beau, faut pas chucher sin pouche ;
Et pis moi l'vendredi, j'minche toudis du pichon,
A mont Théo l'mardi, j'akate eune chuchette rouche.
Dins ch'garache bien muché, j'ai chint mètes ed'fichelle,
Mon père fait du chimint, moi j'cache des limuchons.
Ches jônes i z'ont bien ri quand l'maîtresse vit ch'révelle
Et qu'aIle dit: in n'arrête, i est chinq heures min garchon.
Christian DELATTRE