Avec m'n'homme ch'matin, ch'étot séquence nostalgie !
Quanque nos pères n'rintrotent pas à l'lheure, nos mères ale queminchotent à faire des aller-artour tout l'long de ch'trottoir pour vire si qui arrivot, au passache des voisins ale demindot si ils l'avottent vu.
Pis l'angoisse montant à chaque cop j'intindos " tiote habiles te va vire après tin père."
J'm'arvos l'long de l'rue del fosse jusqu'à ce que j'trouffe un copain à min père qui comprenot, ses infants i faisottent parel, "tin père j'l'ai vu i arrife, i est core au lavalo" ou bien " i a pris l'aute cage".
Là j'faisos demi tour et je m'dépêchos pour aller l'dire à m'mère ale étot rassurée.
Quanque j'ai eu fini d'raconter cha à m'n'homme i m'a dit chez mi ch'étot toudis mi qui étot d'corvée d'aller vire pour min père. (il l'a dit in français, hein, i comprind l'patois mais i n'el'parle pas.)

Cha y est, j'ai compris... Tiote ch'est ti, ch'est nin l'cheftaine... Du cop je t'ai imaginée avec tes sandalettes à blouques, tes soquettes blanques et tes nattes.

Je me dijos aussi que t'étos rudemint familière avec l'cheftaine!

Bon, je suppose que t'n'histoire ch'est eune espécificité des gins qui avottent de l'famile au fond et qui savottent que cha pouvot être dingereux.

Nousautes in n'a jamais eu de problèmes ainsi avec nou père ou nou mère, mais à m'mote qu'eune de mes grinds mères devot avoir ce ginre de problème avec s'n'homme à elle. Sin problème ch'étot nin de savoir si qu'i avot eu un accidint du fond, mais plutôt un accidint de comptoir...

Ouais batisse ch'est nin mi... et cha n'arot pas pu.
Mais deux grinds pères travaillottent à l'fosse mais n'ont jamais été au fond. Mes arrières grinds pères si et ch'est vrai que m'grind mère paternelle racontot cha que dit la clo, faut dire que cheule grind mère avot perdu s'maman à l'âche d'10 ans et que cha devot ête eune doupe angoisse de n'pas vir arriver sin père à l'heure.
J'ai eune photo de c't'arrière grind père là, d'sus l'photo i a 40 ans et in dirot un homme d'70 ans... cha usot sacrément, l'fond !

Par conte min bieau père li, quind i est arrivé d'Italie i a travaillé queques années au fond de l'mine... I n'in a jamais d'trop parlé, in sait juste qu'i a perdu des amis et qui n'a pu voulu descendre... après i a travallé à Usinor.