Tous les ans au mos d'juin in cujit les spectaques de not' abonnemint au théâtre d' l'ville d'à côté pour l'saison d'après qui va du mos d'septempe de l'année in cours, jusqu'au mos d'juin de l'année suivante.
Faut bin sur anticiper su l'planning et ch'est pas toudis évident mais ch'est l'seu moyen d'ête à peu près sur d'avoir des places dins c' théâtre d' 500 plaches qui évite d'aller à Lyon. L'abonnemint i est d'4 spectaques minimun et intre les pièches d'théâtres et les concerts in troufe toudis sin bonheur. Cheule saison in s'artroufe avec 9 spectaques tellemint l'choix y étot dur et qu'in avot invie d'tout vir ! (j'vos dit pas si in pus y avot eu Léon et Gérard !!!!)
Bref cha fait 15 ans qu'in fait comme cha et l'formule nos va bin, in est jamais déçu.
Cheule année, parmi l'programmation in avot cujit l'canteux Hubert Félix Thiéfaine, qu'in connaissot d'nom mais qu'in avot jamais vu su scène. In toute honnêteté in avot pris cha un tiot peu pou découvrir c'que ch'étot et pace qu'in a querre aller au devant d'cosse qu'in connnot pas.
L'spectaque avot lieu hier au soir et in a passé eune exellente soirée, et cha a été eune vraie découverte avec des musiciens excellents, notamment l'guitariste, et des textes intéressants, malgré un son in tiot peu trop fort, qui gachot un tiot peu du plaiji. (mais in étot au balcon et cha devot ête miux à l'orchestre).
In n'savot même pas qu'i étot nominé aux victoires de l'musique, que cha n'est quind même pas c'qui s'fait de miux dins l'ginre et que ch'est pas toudis les meilleu d'récompensé (ch'est un tiot peu commercial, mais ch'est un avis qui n'ingache que mi). Mais c'soir in zappant et in ravisant un tiot peu in vient de vir que Hubert Félix Thiéphaine avot eu l'victoire de l'album de l'année et à min avis ch'est mérité. Cha récompense gramint d'années d'traval et ch'est bin, même si in a pus vir hier au soir qu'i avot des fans à la pelle et que c't'artisse a pas besoin de cheule victoire pou s'faire un public. Hier in a eu des propositions d'rachat d'nou plaches à l'entrée du théâtre d'gins qui n'avottent pas pu in acater.. In se s'rot cru à l’Olympia !!!
Valà ch'étot juste pou dire et si vos connaichez pas, allez l'acouter d'sus you tube, l'derni album "supplément de mensonges" est "rock"....
Pis j'viens d'entente que c'canteux étot aussi nominé dins l'catégorie "artiste interprête de l'année", l'soirée est pet ête pas cor finie pou lui.... mais là i va ête in concurrence avec l'fils d'min ami clarinettiste Benjamin Biolay..., cor un canteux avec des bieaux textes. Pis avec Julien Clerc que j'adore, j'ai presque tous chés disques et Thomas Dutronc (excellent musicien, mais que j'ai jamais vu sur scène). Ch'est amusant des fos les soirées TV... Pou eune fos que j'ravisse eune émission d'canchons d'sus eune grinde chaîne, mi qui préfère les CD !!!!.....
Sujet: Hasard total du calendrier... 
Sam 3 Mar 2012 - 23:36
