J'ai tellemint espliqué commint qu'in faisot l'pudding ou l'pain d'tchien qu'ichi in n'la pas mis ; alors valà :

Cha va pas ête facile d'espliquer cha quanqu'in a l'habitude de l'faire "au pif" (cha ch'est pour Batisse)

Cha s'fait avec du pain tout déssequi.
Pour 4 personnes i fot l'équivalent d'4 grosses tranches ed pain
ginre boulot ou bien 4 morcieaux d'bouts d'baguettes.
In fait tremper ch'pain dins du lait, pour arcouvrir ch'pain sec
à part faire tremper des rojins secs dins un tiot peu d'rhum
Tout cha quanque ch'est bien ramolli (inlever si qu'i a trop d'lait) écraser ch'pain avec eune fourchette, ajouter ches rojins égouttés + 3 cuillères ed castonnate + 3 gros oeufs + 1 tranche ed beurre copés in tiots morcieaux
Beurrer un plat qui va dins ch'four bien caud
Mette l'préparation dins ch'plat, égaliser l'dessus avec l'fourchette
Rajouter par d'zus un tiot peu d'cassonnate et queques nojettes ed beurre
Laisser cuire 40 mn inviron, fot surveiller pour que l'dessus du gâtieau seuche bien doré.

J'vas essayer d'in r'faire. M'soeur, elle rimplachot l' rhum par d'el poute à la vanile, qu'in vind dins les magasins sous le nom de flan. Bien frais, Cha donne un goût ed' fraîcheur, Ch'étot bon!

In n'd'avot causé, mais "chu eune autre chaîne..."

Je ne vas rin dire, mais je note qu'incore eune fos in m'invot un coup de bottines dins mes guimpes. Eh ben je vas te rassurer, la Clo, le pudding, ch'est eune recette que je fais au pif aussi. In puq je cros qu'i a autint d'arcettes de pudding qu'i a de familes....

Par eximple, mi je fais cha in grind, nin comme ti que te te contintes de tros quignons de pain.

Nousautes ichi, avec m'femme et tous les afants, in avot eune huche à pain. Vu qu'in ne fait nin toudis tout comme tertous, la huche elle servot à ringer le pain qu'in n'avot pus beso. Elle se rimplissot à sin rythme, selon l'appêtit des morfals.

Tchand qu'elle comminchot à déborder, i n'd'a l'un ou l'autre qui se décidot à mettre le processus in route in dijint "papaaaaa! il faudrait penser à faire du pudding" (ouais, in causot français ichi, désolé).

Alors papa i prenot sin courache à deux mains et, à partir d'eune huche à pain pleine (cha dot faire facilemint 30 litres) i attaquot:
I fallot eune planque à découper, solite, et un poignard, solite aussi. Avec le poignard, in piquant vers l'planque, i fallot casser les restes de pain dur in morceaux assez tiots, qui étotent alors mis dins eune cocotte mineute grind modèle (dia 28, et i n'avot nin beso du couverque). Par au-dessur du pain, je versos du lait, un litre à l'fos. I fallot compter 5 litres. Je dis un à l'fos parce que intre chaque rimplissache de lait i fallot machucrer le pain dins l'cocote avec un presse purée (une grille avec un manche qui permet d'appuir dessur). Ch'est à dire qu'i fallot que le pain i boive le lait et qu'in puq i se casse in tous tiots morcieaux, qu'in ne sache pus que ch'étot du pain.

I fallot que cha aiche la consistince d'un dégueulis de cat. Ch'est nin très gastronomique, mais ch'est cha qui correspond le miux à l'réalité. I fallot aussi réussir, avec le presse purée, à aller cachi l'marchindise dins les coins du fond.

Bref, eune fos que l'cocotte elle étot pleine (in étot à 3 ou 4 cm du bord) passot la phase délicate de l'introduction des autres ingrédiints....

Je rajoutos à cha:
- eune plaquette de burre, bin ramolli, voire carrémint fondu
- au moins 1 kg de chuc in poute. Ou cristallisé, selon cha qu'i avot. Plutôt 2 kg qu'un d'ailleurs...
- au moins 6 oeufs
- quelques paquets de chuc vanillé
- eune life de raisins secs
- un bon tiers de litre de rhum

Et là i fallot la juer fine pour nin in mettre à côté in artouillint tout pour que cha soche bin homogène.

Après, i fallot trouver des plats pour incriquer tout cha dedins in tassint bin. I n'd'avot in général 4 ou 5: deux grinds rectingulaires so dijint qui n'attachtent nin (mais que je beurros quind même) chu eune hauteur de 4 à 5 cm, deux moules à cake, pis un plat in arcopal qu'in utilisot pour les rôtis et séquos ainsi. Ches 5 là is rintrotent insonne dins le four.

In mettot cha au four, thermostat caud et roule ma poule pour inviron tros quarts d'heure. Les rojins du dessur is virottent au noir.

Pour le bien i fallot démouler au sortir du four, pour laichi l'vapeur de lait bin s'in aller, pour donner un tiot simblint de croûte sèche. Un tiot simblant...

In tous les cas, ch'est nin arrivé souvint qu'in les laisse arfrodir avint d'attaquer le premi.

Ch'étot pour vir si qu'in sintot bin le goût du rhum...

Bien que cha conserve assez longtimps (i paraît...), l'seule façon de raisonner les goulaffes ch'étot de mettre deux ou tros puddings au congélo. Après cha in les arsortot un à l'fos et i fallot attinte qu'is dégèltent.

Hier au soir j'ai fait un grog et i m'est d'avis que ch'étot avec un reste de rhum qui restot de ch't'époque-là. Ch'est nin fameux pour le moral.... In a des fos de l'misère à imaginer qu'in fait eune séquo pour l'dernière fos, ou qu'in vot quelqu'un pour l'dernière fos.

Nosautes aussi in in faisot quind l'réserve d'pain sec augmintot, mais pas autint que Batisse !
Chez nos in disot pudding
Mi j'in ai fait queques fos, mais pas souvint, faut dire j'ai raremint du pain d'reste !

j'artire c'que j'ai dit, in a un espécialiste in pudding !
Mi je n'peux pas attinde d'avoir beaucoup d'restes, à forche d'attinde min pain i sérot tout moisi.

je m'souviens tchin qu'j'étos tiote, Batisse y faijot du pudding à l'majon... y est nin très poetique tchin qui parle de l'consistance ed dégueuli d'cat, mais cha qui compte ch'est l'résultat!
Y mettot gramind d'rhum et in faijot tremper les rojins ed dins avint ed tout touiller insonne dins l'couet. In avot un grand plat in aluminium réctangulaire léger comme tout mais qui pésot au moins tros kilos aveuc l'pudding ed dins.

In incriquot tout cha ed dins et hop au four! Ch'étot étouffe chrétien ch' t'affaire là mais in in mingeot au dessert, au gouter et à chaque fos qu'in passot près du plat... ch'étot nin de l'gourmindisse, ch'étot un acte civique anti gaspillache ed pain!

A l'adolescince après l'école j'allos 1 fos par semaine juer au volley dins un clup à Neuville en Ferrain et avint aveuc m'copine in acatot un bout d'pudding... in pouvot aller contre l'vint après cha. In a jomais fait des performinces extraordinaires in Volley: ch'étot suremint à causse du pain d'quien!