Eune recette ed gauffes liegeoisses pour 10 personnes ( même des goulaffes)
Y faut:
-1 moule à gauffes aveuc des gros trous ( gauffrier à l'electrique cha marche aussi)
- 1Kg ed farine blanque, l'plus simpe.
- Presqu'1 lite ed lait tiede ( nin trop caut sinon l'levure elle va tourner sin nez)
- 5 oeufs d'glaine qu'in va séparer les blincs des jaunes.
- 40g ed levure fraique ( cha s'vint in tiots carrés ed 42 g... in n'fait nin d'menoules pour les 2g ed trop)
- un tiot peu d'cannelle in poute
- 4 patchis ed chuc vanillé.
- 400g ed bure à mitan salé et ramolli ( faut nin l'dire à sin docteur)
- 400g ed chuc perlé ( que ch'est du chuc in tiotes boules comme des grêlons)...là auchi in n'dit rien à sin docteur, d'autint pluque que ça s'vint par 500g et qu'à forche ed d'hochener l'patchi, tout y'a tché dins l'plat!
In va cminchi à délayer l'levure dins un bol ed lait tiède ou frod
In fait monter in neiche les chinq blincs d'oeuf qu'in va mélinger au reste tut duchemint , in saquint s'linque tout cron au coin de s'bouque pour nin faire de l'bouillie.
Pour l'bure, y faut foque el faire ramollir mais pos l'fondre tout caut ( ch'est meilleur pour el goût)
Eune fos qu'in a fait tout cha, in mélinge tout FOQUE el chuc perlé !
In laiche monter au caut 1/2 heure...
Pis ch'est là qu'in met 400 ou 500 g de chuc perlé et in hochène tut duchemint aveuc eune cuillère ed bos.
In peut cmincher à cuire: Y faut foque 1 cuillère à soupe par gauffe, cha s'étale dins l'gauffrier mais nin en rectanque, cha reste un peu in rond.
Si in d'a assez d'joquer et qu'in veut nin y passer l'soirée pour tout cuire , in peut aussi garder un tiot peu d'pâte à cuire pour el lendemain.
En principe cha s'conserffe eune semaine si y'a pos trop d'goulaffes dins l'coin.
Bon appétit