Roger
Sexe : Date d'inscription : 17/12/2009 Messages : 1281 Henin Beaumont
| Sujet: Mi qui n'étos pas Mineur "de Jean Marie Cerf" Sam 4 Déc 2010 - 11:02 | |
|
Mi qui n'étos pas mineur Quand j'étos normalien - pou êt' instituteur - Vlà qu'in est rassan-né edvant not' Directeur. Rapp'iant qu'in allot faire ein difficile métier, ln donnant d'l'instruction à ches tiots écoliers, Qu'ch'étot ein' belle mission et min-me ein sacerdoce, I finit sin discours in nous parlant dé l'fosse. Ch'tot pou nous annoncher qu'in déchindrot au fond, Pou vir commint qu'cha s'passe d'ù qu'in saque el carbon.
Ches mineurs dins m'famill' ayant souvint parlé D'leu misères pa dzous terre, j'n'étos pas imballé. Pou êt' franc, l'jour vénu, j'avos min-me el tran-nette ! Em bouque al étot sèque, et j'chuchos dé l'tablette ... El cache qu'minche à déchind', mon Diu eq cha m'fait drôle. J'sins m'n estomac r'monter, mais j'sins pu mes guibolles. I m'vient ein' froide suée, j'cros qu'in va s'épautrer. Sintant v'nir m'dernière heure, vlà qu'je m'prinds à prier ...
Sain-ne Barpe j'vous in supplie, vous n'n'avez djà fait tant, Faijez in sorte eq ches molettes s'arrêt't à temps! Ben ... al m'a intindu : em'n estomac r'prind s'plache ... « Ichi », nous dit not' guite, « nous vlà à l'accrochache ». Cha rappelle el métro et j'm'attindos à pire. Mais je n'savos pas cor qu'min calvaire allot v'nir : Arpintant ches gal'ries in étot dins l'infer ; J'mettos m'main d'vant min nez pou n'pas r'nifler l'poussière.
Tout d'ein cop in s'artreuve edvant ein mur ed roc. I faut s'mett' à plat vinte, cha m'fout ein drôle de choc. D'm'intiquer dins ch'boïau, ed ramper comme ein fouan, Em tiéte buquant les pieds d'min comarate de d'vant, D'pinser que pa dzeur nous y avot tant d'mèt' ed terre, Je m'sus vu prijonnier, comme dins ein' souricière. J'vous in-r'supplie Sain-ne Barpe, ej m'adrèche cor à vous: Faijez qu'cha n's'éboule pas, j'veux pas mourir là-dzous !
Cha n's'a pas éboulé ... mais que l'calvaire fut long! D'pouvoir es rétamper, cha nous a san-né bon ... Sortis de ch'boïau d'cat in artreuve des mineurs, Saquant comme des bagnards, tout fraiques ed noire sueur ... J'arconnos ch'moustachu, aveuc ses bras tatoués, Qui, raquant sin jus d'chique, nous lance du bord dé l'voé : « Achteur, vous compardez pourquoi - pou sin bonheur- J'n'ai pas voulu qu'min fiu faiche l'métier d'mineur ...
Bin d'z années ont passé ... Edpi l'dernière gaïette, Not' viux pays minier a perdu ses molettes. Mais faut s'ramintuver d'hier et d'ches Gueules Noires, D'ches surhommes qui ont sué, qui ont fait not' vieil' Histoire ... Mi j'pinse toudi à ti, ch'tatoué, ch'moustachu, Ti qui s'a défoncé pou permett' à tin fiu Qu'i seuche instituteur; ch 't'à ti que j'pinse min père, Et jamais j'n'oublierai not' rincont' pa dzous terre.
Mais y a aussi Sain-ne Barpe qu'j'ai jamais oubliée. L'seul' fos qu'j'ai déchindu, ch't'à elle qu'je m'sus confié! Et pi el quat' Décempe, l'z élèves avot't congé; Forchémint, mi aussi j'n'ai longtemps profité! Adon bonne Sain-ne Barpe j'vous ai toudi dins min coeur, Mi l'instituteur, mi qui n'étos pas mineur ...
Jean Marie Cerf Noyelles sous Lens |
|
pépéPéBé
Sexe : Date d'inscription : 25/12/2009 Messages : 4646 Wimille 62126
| Sujet: Re: Mi qui n'étos pas Mineur "de Jean Marie Cerf" Dim 5 Déc 2010 - 15:18 | |
|
|
batisse
Sexe : Date d'inscription : 22/12/2009 Messages : 5194 St Dié dins les Vosges
| Sujet: Re: Mi qui n'étos pas Mineur "de Jean Marie Cerf" Dim 5 Déc 2010 - 15:59 | |
|
Effectivemint: magnifique!
I n'd'a puq qu'in crot des ouvériers qui s'ont saignés aux quatre veines pour que lus afants is ne sochtent nin obligis de faire le même ginre de méti qu'eux. |
|
tiote bellotte
Sexe : Date d'inscription : 22/12/2009 Messages : 3111 Dins le beaujolais (69)
| Sujet: Re: Mi qui n'étos pas Mineur "de Jean Marie Cerf" Dim 5 Déc 2010 - 16:02 | |
|
|
Roger
Sexe : Date d'inscription : 17/12/2009 Messages : 1281 Henin Beaumont
| Sujet: Re: Mi qui n'étos pas Mineur "de Jean Marie Cerf" Dim 5 Déc 2010 - 22:35 | |
|
Ch't'homme qui a écrit ch'poème Batisse, il étot assis devant ti au pestaque de Léon et Gérard. |
|
André
Sexe : Date d'inscription : 23/12/2009 Messages : 71 à 2 incâblures de ch'Mont St Michel
| Sujet: Re: Mi qui n'étos pas Mineur "de Jean Marie Cerf" Lun 6 Déc 2010 - 21:52 | |
|
Ine encyclopédie, ch'Roger.... In va bétôt l'appeler Wikiroger...! Nous, tous, éfants d'mineurs, nous autres, qui l'avons écapé belle, devons à nos parints d'avoir pris ine aut' voie, qui n'a peut'êt pas toudis été pavée de pétales de roses, mais qui nous ont laiché des poumons in état d'nous méner bien pu loin qu'nous anciens. |
|
Roger
Sexe : Date d'inscription : 17/12/2009 Messages : 1281 Henin Beaumont
| Sujet: Re: Mi qui n'étos pas Mineur "de Jean Marie Cerf" Lun 6 Déc 2010 - 22:09 | |
|
Bonsoir André Que j'sus contint de t'lire,cha fait vraimint plaisir - Citation :
- Ine encyclopédie, ch'Roger....
Oh ouais André, j'in ai core eun' péquée de chés poèmes comme cha! ya vraimint des artistes dins not' coin,et qui mérite d'ête connus! l'autre jour j'ai lu l'moitié d'un bouquin d'poèmes patoisant dins min lit,té m'aros vu avec min mouchoir,in arot dit qu'j'avos épluché 10kg d'ognons.... |
|
batisse
Sexe : Date d'inscription : 22/12/2009 Messages : 5194 St Dié dins les Vosges
| Sujet: Re: Mi qui n'étos pas Mineur "de Jean Marie Cerf" Mer 8 Déc 2010 - 19:01 | |
|
Cha arot fait eune rute soupe.... |
|
Contenu sponsorisé
| Sujet: Re: Mi qui n'étos pas Mineur "de Jean Marie Cerf" | |
|
|