El parlache ed nou coin
Ni trouvez point drôle à cha, mes gins,
Que si dins vou départemint
Histoire comme cha pour vous distraire
Qu'in a gardé el lanque à grand mère ..
Surtout én ' trouvez point cha drôle
Si in parle pus comme dins l's' écoles,
Si tous nous viux lifes ed grammaire
l's sont imbernéqués d'poussière.
Pour sûr qu'ln a quer el français,
ln est meinme pou l'incourager;
ln a aussi nou pointe d'orgueul
Quand in intind canter Duteul.
Mais n'creuyez point surtout mes gins,
ln a aussi nou réglemint :
Tous ches accords, après, avant,
Ch' n'est point pour nous, là, deux ronds d'flan !
ln treufe toudis dins nou parlache
Ches épithètes à leu bonne plache ;
Meinme que chés rimes,l's alexandrins,
I nous emènt'nt du tourmint.
Pou qu'cha seuche biau à vous orelles,
Il arrife meinme qu'dins nou sommel,
Qu'intre deux réfes et un ronflache
Que là dins l' noir, vl'à qu'in rabache.
Heureus'mint qu'pour arprinte haleine,
Qu'in a inn' tiote virgule qui traîne,
Et que pour les applaudich 'mints
ln vient toudis glicher un point.
Chi n'est point d'nou faute, nous patoisants
Si nous parints sont v'nus avant,
Pour intiquer dins nou bib'ron
Tout l'viux langache ed nous taïons.
Sûr'mint qu'aveuc cha comme bagaches
Qu'in ni fait jamais des longs voîaches.
Allez sortir ed vous frontières,
Dire à l's inglais « min tiot j't'ai! quer »
Meinme in mettant S'bonne volonté,
Au miux qu'in peuche l'intortiller
Comme nou poètes d'avent la guerre,
Nou Aragon ou nou Prévert
Qu' à peinne passé l' départémint,
Qu'ipou l'peu qu'in dot d'mander sin qu'min,
Pour tros-quate mots sortis d'nou bouque
Qui vot'nt tertous qui dù qu'in s'déjouque.
Mais in est là pou l'dire bien haut
Que nou patois, qui ch'est li l'pus biau,
Qu' ch'est comme el meupe d'un héritache
Qu'ch'est un gros life rimpli d'imaches
Avez d'jà vu, vous, un mineur
Dire in français C'qui a su sin coeur?
El patois il est comme el carbon:
L'met ,l'caleur dins tout l'mason.
Quand in invot, nous, inn' grosse baisse
Pour nous l'écrir in met deux S.
Eh ben! véyez, cha, j'in sus sûr,
Qu'all' claque pu fort su vou figure
J' ravisse souvint là ch't' émission
Chelle à l'télé, « el mot pus long » ;
Mi, in patois, des mots d'neuf lettes
J'in ai rimpli plein des musettes!
Pis y a inn' cosse qui rinfreume tout,
Mais in l'dit chi, là intre nous,
Si nous amis du bas d'la France
Qui v'neut'nt dins l' Nord passer vacances,
Camper deux s'mainnes à ch'bos d'Ohlain
Ou bien péquer là, à Liévin
ln les mettrot vite à la pache :
I's séreut'nt bien qui dins nou parlache,
Qu'in tiot pichon, ch't un épinoque,
Quand l'vint i souffe, que tout berloque,
Qu'el premier r'pas, qu' ch'est déjeunoir
Qu'el goûter d'ches tiots, qu' ch 'est l'archinoir.
ln leu cant'ra nou P'tit Quinquin,
L'canchon dormoire plein d' sintimints,
ln leu donn'rot ch'fameux chirop
Pour eusses imbernéquer leus dogts.
Aussi surtout; veyez mes gins,
Quand in infant, innochemmint,
Que d'és leçon i vous laiche querre
Quette cosse déhors d'ech dictionnaire,
Dites-vous bien là, dind l'fond d' vous-meimme,
La r'lèfe est faite, que belle aubaine,
Quand j' s'rai in haut, li s'ra cor là :
I n' mourra pas nou viux patois.
Isaïe LAMPIN
Sujet: El parlache ed nou coin "Isaïe LAMPIN" 
Jeu 7 Fév 2013 - 15:04
