A ch't'heure que ch'est fait, je chus fier de mi, mais hier je n'd'ai bavé comme un bleu à cause de tiotes vis.

Z'avez déjà vu des vis avec eune tiête ainsi vousautes?


In fait, l'semaine passée j'ai cassé m'machine à expresso que ch'est eune Magimix pour Nespresso. I a eune barre qui étot sortie de sin trou et pus moyen de l'y armettre. In cafotint j'ai cassé un tiot bazar in plastique qui ejecte l'capsule. Je bouillos!

Du coup j'ai acaté eune autre machine, eune même (d'occase, 25 roros). Et hier je m'ai dit que je ne risquos nin grind cosse à vir quo que m'n'incienne elle a dins le vinte, pour comprinte pourquo cheule barre elle s'étot sauvée et ne voulot pus rintrer dins sin trou.

Et ch'est in voulint démonter que je chus tché chu ches fameusses vis. In tout i n'd'a eune dizaine. D'abord j'ai cru que ch'étot des rivets, mais is avottent eune drôle de guiffe pour des rivets. Du coup j'ai cachi chu internénette et j'ai eu l'confirmation que ches saloperies à tête vaguemint ovale ch'est bel et bin des vis. L'otile pour les choper i coute 55 roros!

Mais in France i a des tiots malins et des bricoleux de génie et donc, grâce à internénette, j'ai pu me fabriquer l'otil qui faut, à partir d'un boulon de 7 dont je n'ai gardé que l'partie lisse, d'eune mèche de 3.5 et d'un cop de serrache du trou dins l'étau pour ovaliser.

In met ch'bazar dins le mandrin d'eune dévisseusse et yahoo, cha marche. Infin, cha marche après grammint grammint d'essais et grammint grammint de gros mots parce que pour l'ovalisation du trou, i faut viser juste. Elle a bin failli voler au bac à l'ordure cheule machine...

A ch't'heure cha y est, m'barre têtue elle est armisse in position. Je n'd'ai profité pour démonter des séquos qui n'avottent nin beso d'être démontés, mais j'aime bin savoir commint que ch'est fait ches bazars que j'utilisse.
Chériche chu le gâtieau, j'ai trouvé un site d'ùche que je peux acater m'piche in plastique cassée, pour 5.5 roros. M'cafetière elle va arprinte du service, je le sins.... Cha quet bin, je l'aimos bin.

Pour l'instint, elle arsonne à cha:


Ch'est copliqué là-dedins... eune vraie usine à gaz! In tous les cas, ch'est du viux matos made in Europe (chez les chuiches) et in dira cha qu'in veut, ch'est du bieau matos. A part ces foutues vis protectrices de service après vinte!!!!

Pourquo faire simpe quand qu'in peut faire compliqué.....d'toute façon, ch'est toudis pour immerder l''ovrier......

Cha dot ête pou cha que l'slogan d'nespresso ch'est "what else ?" (quoi d'autre ?)........

j'espère qu'après cheule délicate opération chirurgicale digne de Georges Clooney dins l'feuilleton "urgences" t'as bu un bon café et nin un "décaffeinato".... (j'sais que té ravisses nin gramint l'télé mais j'sus sure que té vas comprinde)

J'ai vu ch't'affaire de décaféinatto machin à l'télé. Cha que j'ai compris ch'est que l'greluche elle trouve que l'association Georges Clownesque et café déca cha la fait débinder (pardon, je ne trouve nin miux comme imache...).

Ch'est eune pub que je ne comprinds nin, vu qu'elle incinère que les buveux de décaféiné ch'est des lopettes. Etringe de l'part d'eune boîte qu'elle fabrique du déca énon?

J'in bos du décaféinatto. In fait je n'ai que deux sortes de capsules: livanto et décafeinatto intense, que ch'est rudemint bon d'ailleurs....

Bon, allez, un bon diminche à tertous, i fait bieau, cha sint la ballade motocyclisse.

Ah ti aussi elle t'énerfe cheule pub là ? nosautes aussi...
Min homme pace qu'i s'deminde toudis c'qu'in peut bin treuver à Georges, vu que li n'est ni si différint de c't'homme là (propos qui n'ingache que min homme !) et qu'i n'y a nin d'greluche qui s'intéresse à c'qu'i bot... (bon, mi j'm'y intéresse mais apparemment cha n'a pas l'même effet !)
Pis mi elle m'énerfe cheule pub, pace que même si Georges i voudrot eune camomille, bin y serot l'bienvenue chez mi !
Pis t'as raison i est bon leu décaffeinato... l'preufe ? j'in bois, et comme tertous sait, j'sus eune femme de goût (ouais cha va bin les chevilles, merci !)...

Pou les vis d'toute façon i cange chés modèles à chaque nouvielle série ,

CH'est justemint fait , pou qu't'i mets pas tin nez lad'dins ,

pou i faire ti même l'réparation

comme cha is distent qu' l'matos i est kapout ,

pis que si té racate eune nouvielle machine , in va t'faire

cadeau du coût du démontache d'el vieill' ,

qui pou eux n'est pu réparape:affraid: