Hmmm. Si que vous ne connaichis nin cha, vous avez vécu pour rin.
Le plus dur ch'est de trouver l'joue de pourcheau au boutique. Ch't'au matin, après que j'ai été à l'déchetterie vuder le reste des larmes de min saule brayou, j'étos parti à la Coop pour acater un bistèque ou eune séquo ainsi et... i avot de l'joue de pourcheau! In puq elle étot in réclame. 5 roros le kilo ou eune séquo ainsi. Cha, j'in mingeros chu l'tiête d'un pouilleux.
Comme i faut cuire longtimps, à midi j'ai mingé eune trinche de gigot de mouton, elle aussi in réclame. Avec grammint d'al. J'ai fait bonne chère.
L'joue de pourcheau elle est à ch't'heure cuite et j'attinds à demain avec impatiinche pour buquer dedins...
Pour préparer in gros 1 kg de barbaque (euh, mi je ne pinse nin, je chus sur. Je ne vise personne mais suivez min argard qui mile vers le sud ouest
):
- 2 oignons, des gros
- 250 grammes de lardons, funqués ch'est miux
- eune cuillère à soupe de miel
- deux canettes de bière brune
- du sel
- du poiffe IN QUINTITE RAISONNAPE (là non pus je ne vise personne, mais in a tertous nous argards qui arwettent dins l'même direction occidintale...)
- un tiot peu de beurre(*)
- un tiot peu d'hule(*)
- un couet
Laver le couet et évintuellemint le reste de l'vaisselle in retard, éplucher les oignons, ouvrir les paquets de lardons, décapuceler les boutelles de bière et ne rin boire.
Faire rissoler l'viinte dins un mélinche huile/beurre, ou tout huile si vous êtes tout au sut, ou tout beurre si vous êtes à l'ouest (au sins propre...). (*) Marie-Claire te serres t'guiffe, je t'ai vue ricaner dins tin coin!
Eune fos que ch'est rissolé, vuder tout cha dins l'couverque du couet ou eune séquo d'autre qui peut recueillir cha, in attindint plus tard pour tout arprinte. Attintion, i a un tiot peu de jus. Nin grammint...
Fare rissoler les oignons copés in tiots bouts, et les lardons eux aussi copés in tiots bouts (in général ch'est comme cha qu'in les acate). Rissoler cha ne veut nin dire noircir hein...
Eune fos que ch'est rissolé, mettre le miel, touiller un tiot coup, armettre l'viinte et vuder les 2 canettes de bière. Poivrer raisonnablemint (chut, sérieux...) et trimper sin dogt pour juger combien de sel qu'i faut (cha dépind de l'salaison du lard). Saler selon goût.
Mettre le couverque, amener à ébullition, baisser le gaz ou l'éleuctrique si que vous avez un gaz éleuctrique, et laisser mijoter 2 heures.
Ch'est tout.
Comme déjà dit... hmmmmm! In accompagne cha avec cha qu'in veut. Mi cha sera avec des spaetzlés frais. Après, avec cha qui restera de viinte, je verrai au fur et à mesure. I n'd'a peut-être qui finira au congélateur.